CEBU, Philippines – Nasikop sa mga sakop sa PNP Provincial Public Safety Company ang duha ka lalaki nga kuyog sa laing lalaki nga armado kay nakuhaan sila og ginadiling drugas human sa ginukoray nga nahitabo pasado alas 11 sa gabii niadtong Biyernes didto sa Barangay Tunga, Moalboal.
Sila si Roland Lendio, 40, ug Sofronio Escultor, 53, na-corner sa mga polis nga migukod kanila. Ang mga sakop sa PPSC nagpatrolya sa maong lugar ug nasigpatan nila ang tulo ka lalaki nga naglingkod sa kilid sa karsada.
Dihang naiwagan sila sa suga sa patrol car, usa sa tulo ka lalaki nasigpatan sa kapolisan nga may gigunitan nga wala matino nga kalibre nga armas ug mialibwag sila pagpanagan paingon sa kalibonan.
Sila si Lendio ug Escultor nakuhaan og tag-unom ka gagmay nga pakete nga shabu ug drug paraphernalia.
Wala madakpi kadtong lalaki nga nagbitbit og armas. Ang duha ka dinakpan pasakaan og kaso nga kalapasan sa Comprehensive Dangerous Drugs Act of 2002. (BANAT NEWS)