CEBU, Philippines – Mga hayag nga reindeers ni Santa Claus, mga parol ug nagkalain-laing kolor sa Christmas lights ang makita sa kadalanan sa Pajo, Dakbayan sa Lapu-Lapu sumpay sa Mandaue-Mactan Bridge.
Matud ni Pajo Barangay Kapitan Junard "Ahong" Chan nga usa kini sa ila’ng kalihukan atol sa umaabot nga Pasko nga gitawag og "Pasko sa Pajo" diin usa ka "light-up a tree contest" ang gipahigayon sa niagi’ng Miyerkules.
Ikaduha na ka tuig ang kalihukan.
Niadto’ng Miyerkules opisyal nga gipasiga ang mga suga alas 8 sa gabii ug gitambungan ni Mayor Paz Radaza, anak nga si Kongresista Aileen Radaza, Bise Mayor Marcial Ycong ug mga konsehal sa siyudad.
Ang indigay sa Christmas lights matag kahoy nga nahimutang sa center island gisalmutan sa 26 ka grupo nga sakop sa barangay.
"Ang activity nato is a way of uniting the residents or bonding sa mga Pajoanon sa pagpangandam sa nagkaduol nga Pasko o ang natawhan sa Manunubos," matud ni Chan.
Sagad sa nangapil sa kalihukan ang grupo sa mga senior citizens, persons with disabilities, mga eskwelahan, sakop sa barangay ilabi na ang mga Bible study groups ug ang Philippine Air Force sa Mactan Benito Ebuen Air Base.
Ang tema sa kalihukan matud ni Chan, gitawag og "Ang kahayag sa Pasko sa Pajo nakahatag og kahiusahan, deretso sa dalan sa kaayuhan ug kalambuan para kanato’ng tanan."
Dugang sa kapitan nga wala’y gihatag nga budget ang barangay sa mga grupo tungod kay usa kini ka contest ug mismo ang nagkakain-laing sektor ang nangita’g paagi sa pag-decorate sa gi-assign nga lugar.
"Ato gi-emphasize ang lights. Ato sab makit-an ang ila’ng creativity nila, pinaagi ani," dugang ni Chan. Ang final judging sa mga dekorasyon matag grupo ug ang announcement kung kinsa ang mananaug mahibaw-an karong Disyembre.
"Pre-judging pa man ta ron. Ato gitan-aw sa kung kinsa’ng decoration ang maka-sustain. Pwede sad nila ma-improve og maayo ang ila’ng mga decorations. (BANAT NEWS)