CEBU, Philippines - Moabot karong alas-10 sa buntag ang International Eucharistic Congress 2016 Symbol gikan sa paglibot-libot niini sa tanang archdioceses ug dioceses sa Pilipinas.
Usa ka welcome program ang buhaton sa Mactan Cebu International Airport pagsugat niini. Una ining gipadala ngadto sa Diocese of Dumaguete niadtong Enero 25, 2015 ug gitapos niadtong Nobiyembre 10 sa Diocese of Basilan sa Mindanao.
Mabulokon ang pagsuroy sa IEC Symbol sa nagkadaiyang mga lugar, tungod kay mga nagkadaiyang kalihukan ang giandam nga gitambongan sa bagang duot sa katawhan.
Matud pa ni Rev. Jonathan Rubin, usa sa mga nikuyog sa Simbolo ngadto sa Jolo, Sulu bisan og aduna silay mga kabalaka sa seguridad luwas gihapon silang tanan nga nakabalik dinhi.
Sumala pa ni Rubin, gipakita sa mga Kristiyano sa Sulu ang hugot nga pagtuo kang Kristo bisan sa mahagitong sitwasyon sa ilang pagpuyo didto. Ang IEC Symbol isuroy usab sa pipila ka mga bahin sa Sugbo, samtang nagpaabot sa pagpahigayon sa International Eucharistic Congress nga ipahigayon dinhi sa dakbayan sa sunod nga tuig.
Pagkagabii ipahigayon usab ang IEC 2016 Choral Concert sa Archdiocesan Shrine of the Sacred Heart sa may dalan Jakosalem ug sundan kini sa Nobiyembre 20, sa SM City Cebu Northwing; dayon sa Nobiyembre 22 sa The Terraces, Ayala Center Cebu, ug Nobiyembre 28, sa Cebu Metropolitan Cathedral.
Ang maong konsiyerto gimugna aron makahatag espiritwal nga pagtulon-an sa katawhan pinaagi sa pagpamalandong sa mensahe sa mga awit. (Rowena D. Capistrano/EIM)(BANAT NEWS)