CEBU, Philippines – Gitulis na usab sa wala pa hiilhing armadong tawo ang usa ka ahente sa tobacco company ug nakuhaan kini og P5 mil nga halin didto sa Barangay Dakit, Bogo City kagahapon sa hapon.
Si Albert Mejido, 30, empleyado sa Phillip Morris Fortune Tobacco Corporation, midangop sa Bogo City Police Station ug mitug-an nga usa ka armadong lalaki ang mitulis kaniya.
Base sa imbestigasyon sa kapolisan nga samtang si Mejido miadto sa Mader's Store ug nagkuha sa iyang mga stocks aron ibaligya sa tindahan kalit lang miabot ang usa ka tawo nga nagmotor.
Ang maong lalaki nag-helmet ug nagtabon sa iyang nawong ug mibunot og.357 Magnum revolver, dayon gition sa dughan ni Mejido.
Gimandoan sa tulisan ang ahente sa sigarilyo nga ihatag kaniya ang bag ug pagkahuman mipasirit kini og padagan.
Wala pay kasiguroan kun masulbad ba sa kapolisan ang maong pagpanulis. (BANAT NEWS)