CEBU, Philippines - Gihatagan og ikaduhang higayon sa Land Transportation Office (LTO)-7 ang drayber sa taksi nga gipasanginlang nanghinol ug nanghagad og sex sa pasahero niining dalagita.
Ang gipatawag mao ang drayber sa taksi nga nag-viral sa Facebook dihang gi-post sa iyang biktima ang video sa giingong pagbinastos niini samtang kini ug ang iyang mga kauban nagpahatud kaniya.
Ang insidente nahitabo niadtong Oktubre 23 ning tuiga samtang nagmaneho kini sa Richielda Taxi nga may plakang GXL 860 ug body number nga 0757.
Diin usa ka 24 anyos nga empleyado sa usa ka pharmaceutical company ang mipasangil nga samtang sakay sila sa taxi niini uban sa iyang iyaan, ig-agaw ug duha ka katabang gikan sa usa ka mall paingon sa siyudad sa Mandaue giingong gihinol siya niini.
Ang 24-anyos nga biktima naglingkod sa fronseat ug matud pa gihagad pa gyud sa drayber nga makighilawas. Ang drayber gikataho usab nga nag-over speeding ug giingong sa ngitngit nga dapit sila giagi niini.
Sigon ni Joel Maloloy-on, Operation Chief sa LTO-7 nga giturn-over na sa operator sa Richielda Taxi ang lisensiya sa drayber niadtong miaging semana aron mopatim-aw kini sa buhatan sa LTO.
Kun mapakyas gihapon sa pagpatim-aw sa LTO karong Nobiyembre 9 ang maong drayber suspensuhon na gyud ang lisensiya niini sumala pa ni LTO-7 Regional Director Arnel Tancinco.
Samtang ang Land Transportation Franchising and Regulatory Board (LTFRB)-7 miingon nga wa makatubag ang gipasanginlan nga drayber sa reklamo nga gipasaka diha sa ilang buhatan.
Ang operator sa maong taxi nga si Richard Cabucos, kinsa mao usab ang Presidente sa Metro Cebu Taxi Operators Association gikatakdang moatubang sa buhatan sa LTFRB-7 karong Nobiyembre 11 aron mohatag sa habig sa kompaniya. (Decemay P. Padilla/EIM)(BANAT NEWS)