CEBU, Philippines - Grabe’ng pagkaangol sa barangay kapitan ug asawa human napunggit sa usa ka bus nga gimaneho sa drayber nga giingong nakatulog.
Ang insidente nahitabo sa sitio San Antonio, Binabag, dakbayan sa Bogo alas 4 pasado kagahapon sa kadlawon.
Si Police Officer 1 Avito Mansing Jr., traffic field investigator, sa Bogo City Police Station, niila sa mga biktima nga si Gaway-Gaway, San Remigio barangay kapitan Romeo Macasero Sumbi, 55, asawa nga si Leonora Bercero Sumbi, 65.
Matud ni Mansing nga nagdagan padulong sa amihanan ang Toyota Tamaraw FX nga nagdala sa plate number GKU 645 nga gimaneho sa kapitan diin luwan ang asawa.
Ang Cebu Auto Bus nga nagdala sa plate number 7MC 2435 nga gimaneho ni Conrad Valles Jo, 34, taga Lower Kalunasan, dakbayan sa Sugbo nga gikasugat ang kalit lang nisimang sa pikas lane hinungdan sa pagkapunggit sa sakyanan nga gimaneho sa kapitan.
Gumikan sa kusog nga impact, ang sakyanan nga gimaneho sa kapitan ang nakasinati og grabe’ng kadaut nga nakaingon sa grabe’ng pagkaangol sa magtiayon hinungdan nga dali sila’ng gidala sa Bogo Provincial Hospital apan gibalhin sa pribado’ng tambalanan sa dakbayan sa Sugbo. “Ang konduktor nga nakamatikod sa pagsimang sa laing lane sa karsada sa giluwanan nila’ng sakyanan mao lamang ang nakasinggit nga mabangga ta,” matud ni Mansing.
Dugang niya nga lima lang ang sakay nga pasahero sa bus nga pulos usab nahinanok og katulog. Si Mansing niingon nga sa pakisusi nga ila’ng gihimo mao’y ila’ng nasuta nga nakatulog ang drayber sa bus nga pasaheroan hinungdan sa kalit niini’ng pagsimang sa pikas lane nga mao’y nakaingon sa aksidente sa sakyanan. (Romeo T. Limpangog/GMR)(BANAT NEWS)