CEBU, Philippines – Nasubo ang kinatibuk-ang pamilya sa The Freeman ug Banat News human sa pagpanaw sa usa sa mga haligi niini human sa taas ug mabulokon niyang mga tuig nga panerbisyo dili lang sa duha ka mantalaan kondili hasta sa industriya sa journalism.
Kagahapon sa hapon gibawian na sa iyang kinabuhi si Sir Juanito V. Jabat nga gianggaan og “Nits,” ug “Jabs” sa iyang mga suod nga higala, human siya nakasinati og cardiac arrest. Siya nag-edad og 83-anyos.
Ang Editor-in-Chief sa The Freeman ug Banat News nga si Quennie Bronce miingon nga bisan wa gyud siya makatrabaho “side by side” ni Jabat apan kanunay sila niining mag-estorya sa telepono.
Matud pa niya kang Jabat niya nakat-onan ang usa ka importante nga leksyon sa panarbaho.
Kay bisan pa man nga nagmasakiton na si Jabat nagsige gihapon kini og edit og estorya sa Banat News apan dihang gimenosan ni Bronce ang iyang trabahoon nipadala kini og suwat reklamo ngadto kang Bronce.
Matud pa ni Bronce, miingon si Jabat sa iyang sulat nga “Day Quen, padad-i intawon ko og trabaho kay mauwaw ko nga sige ko og sweldo unya wa na ko'y gitrabaho.”
“Mr. Jabat wanted to contribute to the newspaper even if his body was already complaining. That is dedication in its truest form. He will be greatly missed,” dugang ni Bronce.
Usa sa gisundan kaayo nga lindog ni Jabat mao ang “Have Bat Will Strike” diha sa The Freeman nga mao ang palabtik sa mga tawong angay labtikan ug ingon man mga isyu apan gipaagi sa komedya ang pagkasuwat. Si Jabat usa sa mga mipabarog sa The Freeman sukad niadtong tuig 1965 dihang “gi-revive” kini ni Jose “Dodong” R. Gullas.
Si Miguel Belmonte, Presidente sa The Philippine Star miingon nga nasubo kaayo siya sa kamatayon ni Jabat.
Si Belmonte miingon si Jabat mao ang kinamaayohan nga Editor-in-Chief nga iyang nakatrabaho ug bukas sa mga bag-ong ideya.
Gihulagway niya kini nga usa ka team player ug respetado sa mga kaubanan sa trabaho ug ang iyang kamatayon dako nga kawad-on sa The Freeman ug sa Philippine journalism.
Ang Chairman sa The Freeman ug Banat News nga Jose “Dodong” R. Gullas nakurat pagkasayod sa kamatayon ni Jabat kinsa giisip na niyang iyang maguwang.
Dugang pa ni Gullas nga kataposan niya nga nakita si Jabat dihang mibisita siya ug ang iyang asawa nga si Nena kauban sa mga opisyales sa mantalaan sa balay ni Jabat niadtong adlaw niya nga natawhan sa Hunyo 24.
Matud pa niya nga daw kagahapon lamang nga siya, si Jabat ug si Balt Quinain, ang gibansagang “Three Musketeers” nagplano sa pagpabarog og balik sa The Freeman.
“Mr. Jabat will be missed. My family and I, as well as The Freeman and Banat staff, will pray for your safe journey into the hands of our Lord,” sumala pa ni Gullas.
Si Jabat nahimong Editor-in-Chief sa The Freeman ug nahimong publisher niini ug EIC sa Banat News. - /EIM) (BANAT NEWS)