CEBU, Philippines – Gihulagway ni kanhi kongresista Tomas Osmeña ang iya’ng line-up sa Bando Osmeña Pundok Kauswagan (BOPK) nga naa’y balanse ug kompleto ug maoy mangulo sa lainlaing kalihukan.
Kini human pormal nga gipresentar ang ila’ng mga kandidato sa San Pedro Calungsod Chapel kagahapon.
Sumala pa ni Osmeña nga gipili nila ang San Pedro Calungsod Chapel tungod kay may sentimental value kini nga kaniadto gisanapan pa sa dagat apan karon daku na og kalambuan.
Ikapares ni Osmeña si Konsehal Nestor Archival sa pagka-bise mayor ug magpasubli sila si Kongresista Raul del Mar sa North District ug Kong. Rodrigo Abellanosa sa South District.
Ang mga konsehal sa North District mao sila Konsehal Nida Cabrera, Alvin Dizon, Alvin Arcilla, Sisiño Andales, Mary Ann delos Santos, Banilad konsehal Malou Tabar, Tejero konsehal Garry Lao ug kanhi bise mayor Joy Augustus Young.
Si Young wala nakatambong kagahapon sanglit may giadto sa kaulohan.
Samtang sa South District sila si Konsehal Margarita “Margot” Osmeña, Eugenio”Jun” Gabuya, Danilo Pacaña, Labangon kapitan Victor Buendia, Mambaling konsehal Anne Vestil Palomo, Randy Navarro, kanhi PBA player Bonnel Balingit ug Allan “Goliat” Nacorda.
Gibanabana nga mokabat sa kapin usa ka libo ang supporters nga nitambong sa kalihukan kagahapon.
Sa wala pa ang pagpresentar, usa ka Santos nga Misa nga gidumala nila’ng Monsignor Roberto Alesna ug kura paruko sa San Pedro Calungsod Chapel nga si Monsignor Vicente "Junie" Tupaz.
Giawhag ni Alesna ang mga aspirant candidates sa dili paggamit sa ila’ng posisyon aron sa pagserbisyo sa ila’ng kaugalingon nga interes.
Si Archival sa iya’ng bahin nibutyag nga daku’ng hagit kaniya nga ikaatbang ang iya’ng amigo nga si Bise Mayor Edgardo Labella sa Team Rama kinsa iya’ng gihulagway nga nakasukad na. - /GMR) (BANAT NEWS)