CEBU, Philippines – Gihangop sa mga magpapatigayon sa dakbayan sa Mandaue ang pagpaayo sa Cebu International Convention Center (CICC) tungod kay ang maong edipisyo ang haom gayod alang sa mga pasiugdahan nilang mga kalihokan.
Si Marlene Bedia, executive director sa Mandaue Chamber of Commerce and Industry (MCCI) miingon maayo gyud nga adunay lapad nga venue sa mga kalihokan sa mga negosyante sama sa mga trade exhibits.
Gawas nga hamugaway ang CICC anaa pa gayod sa sentro nga dali kaayong mahapit sa pagbisita sa mga langyaw ug mga dumuduong.
Sa nasayran, ang Department of Trade and Industry (DTI) maoy gitahasan sa Malakanyang sa paghimo sa maong plano alang sa paglakip na unya sa gahin og salapi sa sunod tuig 2016.
Sa laing bahin, malampuson ang Trade Expo nga ilang gihimo diha sa Expo Center sa Oakridge Pavilion sa dalan A.S. Fortuna sa dakbayan sa Mandaue.
Ilang gi-display ang mga lokal nga produkto nga ginama sa nagkadaiyang pabrika sa Mandaue City nga naglakip sa mga gifts, toys, gamit sa balay ug mga furnitures.
Si Clayton Togonan sa Barangay Pagsabungan nga maoy tag-iya sa sakyanan nga ginama sa butay sa lubi ug balay sa anay miingon nga daghan pang produkto nga ginama sa dakbayan nga angay gayod ipasigarbo. - /EIM) (BANAT NEWS)