CEBU, Philippines – Gikatakda na nga mosang-at sa ila’ng certificate of candidacy ang grupo ni Konsehal Emmarie “Lolypop” Ouano-Dizon karong Miyerkules sa buntag.
Apan sa dili pa, usa ka Santos nga Misa ipahigayun alas 7:30 sa buntag sa National Shrine of Saint Joseph Parish una pa moadto sa buhatan sa Commission on Elections ang grupo.
Ang grupo nagdala sa bandera nga “Lolypop sa Masa” apan wala pa natino kung unsa nga partido ang mohatag sa ila’ng certificate of nomination and acceptance (CONA).
Sayo niini si Ouano-Dizon nagpaabot kung kinsa tali nila’ng Kongresista Gabriel “Luis” Quisumbing ang ituboy sa Liberal Party.
Si Quisumbing ang gihugunhugunan usab nga modagan sa pagka-mayor nunot sa pagkapupos na sa termino ni Mayor Jonas Cortes nga pareho’ng sakop sa LP. Si Cortes gikataho nga modagan sa pagka-kongresista.
Si Ouano-Dizon ang modagan sa pagka-mayor ug iya’ng pares si Konsehal Bethoven Andaya sa pagka-bise mayor.
Ila’ng konsehales sila si Emiliano Rosal, Procopio Villanueva, Atty. Erwin Heyrosa, Sol Cabahug, Elmer Cabahug, Joy Ouano, Yong Mendoza, Wading Monsanto, Ben Basiga ug Kapitan Editha Monteza. (BANAT NEWS)