Drug den gironda
CEBU, Philippines – Usa ang angol ug 15 ang nasikop sa Philippine Drug Enforcement Agency 7 lakip na ang gidudahang drug pusher atol sa pagpangronda sa usa ka drug den sa Barangay Pusok, sa dakbayan sa Lapu-Lapu pasado alas 3 sa hapon.
Ang subject sa search warrant naila nga si Gretchen Booc, 30, apan may nadakpan pa ang PDEA 7 nga mga lalaki nga 15 ka buok nga mibisita sa maong drug den. Ang maong operasyon gipahigayon human sa usa ka semana nga surveillance operations. Sa wala pa gi-implimentar sa PDEA7 ang search warrant gipalitan pa nila si Booc og usa ka pakete nga shabu bale'g P150.
Human niini gisikop dayon siya sa mga ahente sa PDEA ug nabulabog na ang drug den nga diin giingong nanuyop ang 15 ka mga dinakpan.
Apan may usa nga midagan diha agi sa atop ug aksidente natagak ug nasamad ang agtang.
Nakuha gikan sa drug den ang 11 ka medium packs sa gituohang shabu nga mokabat og kapin sa tunga sa milyon ka pesos. Sumala pa ni Agent Levi Valmoria, nga niadtong Oktubre 1 pa lang nila nadawat ang reklamo bahin sa operasyon ni Booc ug ila dayon kining giaksyonan. Apan si Booc mihimakak nga siya maoy operator sa drug den kay matud niya tigluto ra siya sa maong balay.
Apan nasuta sa PDEA nga pito niya ka igsuon ang nabalhog karon sa prisohan tungod gihapon sa ilegal nga drugas.
Dihang gipangutana kini sa mga sakop sa media, si Booc miingon nga: "mag-reunion" sila sulod sa prisohan. - /EIM) (BANAT NEWS)
- Latest