CEBU, Philippines – Nasikop sa joint operation sa kapolisan sa lungsod sa Dalaguete ug Alcoy ang lima ka lalaki lakip na sa usa ka lalaki nga wanted ug duha ka menor de edad pasado alas 5 kagahapon sa buntag sa sitio Amonsao, barangay Catolohan lungsod sa Dalaguete.
Ang maong joint operation gipangulohan nila ni Senior Inspector Joseph Berondo ug ni Senior Inspector Jomar Mede nga mga hepe sa Dalaguete ug Alcoy Police Stations.
Ang maong operasyon miresulta sa pagkasikop ni Buenaventura “Boy” Maglinte, nga wanted sa kasong murder ug sa iyang mga kaubanan nga sila si Reynaldo Ensila Carubio, 18; John Bert Nieves Odias, 20; ug laing duha ka armado nga mga lalaki nga menor de edad.
Matud pa nga giukoy sa kapolisan ang suspek sa iyang hideout dala ang warrant of arrest, pag-abot sa kapolisan sa Alcoy ug Dalaguete sa maong lugar ila dayong gisikop ang suspek ug mga kauban.
Nakuhaan og usa ka medium pack sa gituohang shabu gikan ni Maglinte nga mokantidad og P59 mil; si Carubio nakuhaan og paltik nga kalibre .38 nga revolver; samtang si Odias nakuhaan og usa kalibre .45 nga pistola nga may duha ka bala.
Ang usa sa mga menor nakuhaan og duha ka pakete nga shabu ug ang usa nakuhaan og usa ka .38 kalibre nga paltik nga revolver nga may tulo ka bala. Daling gidala sa Dalaguete Police Station ang maong grupo aron mapasakaan og kaso samtang ang duha ka menor gi-endosar sa Municipal Social Welfare and Development Office aron susihon kun aduna ba silay tulobagon sa balaod. – /EIM) (BANAT NEWS)