CEBU, Philippines – Miabot og 60 ka pamilya ang apektado sa sunog niadtong Biyernes sa hapon sa sitio Cadahonan, barangay Talamban sa dakbayan sa Sugbo sumala pa sa Department of Social Welfare Services (DSWS).
Adunay gihimong panagtigom ang DSWS, Cebu City Disaster Risk Reduction Management Council (CCDRRMC), ug barangay kapitan ug principal sa Talamban Elementary School aron tukion kun unsaon pagtabang ang mga nasunogan.
Nauyonan sa meeting nga temporary unang ibutang sa maong eskuylahan ang mga nasunogan samtang sila suportahan sa ilang panginahanglan sa siyudad.
Ang DSWS nihatag na og banig, unlan, relief goods ug uban pang batakang panginahanglan sa mga pamilya nga nasunogan matud pa ni DSWS chief Dr. Ester Concha.
Ang siyudad gikatakda usab mohatag og P3 mil nga cash ug housing materials alang sa mga nasunogan.
Si Kapitan Dario Arcilla nagkanayon nga mohatag og housing materials ang barangay gikan sa gigahing pundo nga P150 mil.
Sumala pa sa kabomberohan giingong adunay nanuyop og shabu sa balay ni Richard Hermoso niadtong higayona nga diin nagsugod ang sunog.
Tungod kay kadaghanan sa kabalayan ginama sa light materials dali kaayo nga mikatap ang kalayo.
Nakadugang usab sa problema ang gamay nga dalan sa lugar ug lisod sudlon sa mga fire trucks.
Napaso usab ang usa ka 60 anyos nga lola nga si Erlinda Himaya ug gidala sa tambalanan.
Dugang pa ni Concha nga sa dili pa ibalik ang mga nasunogan didto sa ilang lugar magpahigayon og misting ug larvaecide operation ang Cebu City Health Department (CDH) tungod adunay duha nga gidudahan nga kaso sa dengue ang maong dapit nga anaa pa gihapon karon sa tambalanan. – /EIM) (BANAT NEWS)