CEBU, Philippines – Hugot gyud ang tinguha sa grupo’ng Crusade Against Violence nga buksan pagbalik ang imbestigasyon may labot sa pagkamatay ni Karen Kaye Montebon aron masusi kun unsa’y mga kaso nga mahimo’ng isang-at.
Gani kagahapong adlawa, ang grupo niadto sa buhatan sa Criminal Investigation and Detection Group-7, Scene of the Crime Operatives ug Police Regional Office-7 aron pag-follow-up sa kaso.
Ang CIDG-7 ang investigation team sa kaso hinungdan nga sa mao’ng buhatan sila niadto aron pagklaro kun unsa nga kaso ang mapasaka.
Sa wala’y lipud-lipod giangkon ni Chiong nga wala siya ganahe sa pamahayag ni Senior Superintendent Armando Radoc, director sa kapolisan sa dakbayan sa Lapu-Lapu nga “case closed” na ang kaso ni Montebon.
Gitataw ni Chiong nga angay ablihan og balik ang imbestigasyon ug kinahanglan nga klaruhon aron adunay kaso nga masang-at ilabi na nga si Jennalyn Soon, kaipon sa suspek nga si Ruben Fernandez, wala’y tulubagon sa hitabo bisan og siya ang hinungdan nganong naabot si Fernandez sa panimalay sa mga Montebon.
Ang CAV nakasabot usab sa gibati sa pamilya’ng Montebon nga bisan sa himuong re-investigation, dili na mahibalik ang kinabuhi sa ila’ng anak hinungdan nga kanunay sila’ng nakig-alayon sa pamilya.
“Tinuod na, bisan ang akoa gani mao man na, nangita lang ko’g hustisya sa ako’ng anak, mao sad na’y angay nila’ng buhaton, magpa TY lang diay siya, Thank you nga napatay ang iya’ng anak, dili na maayo,” matud ni Chiong.
Ang regional chief sa CIDG-7, Superintendent Marlon Tayabam niingon nga ang Special Investigation Task Group nagpaabot sa resulta sa forensic examination ug hisgutan pa kini sa task group.
Dugang ni Tayabam nga ila’ng gikolekta ang tanang pamahayag nga ila’ng nakuha ug gipaabot nga ila kini’ng i-evaluate.
Samtang si Senior Superintendent Rey Lyndon Lawas, SITG commander, niklaro nga sukad pa niadto’ng pagkasulbad sa kaso wala sila moingon nga abswelto na si Jennalyn tungod kay nagtuo sila nga duna pa’y motumaw nga mga ebidensiya.
Tungod niini iya’ng gimando sa mga sakop sa SITG nga i-review ang mga ebidensiya nga anaa karon sa ila’ng kostudiya. – /GMR) (BANAT NEWS)