CEBU, Philippines – Gitanggong na sa Toledo City Police Station ang lima ka lalaki nga naaktohan nga nagsuyop og shabu atol sa pagronda sa sitio Maraat Dako, Matab-ang, dakbayan sa Toledo.
Ang mga dinakpan mao sila si Gilbert Morallas, 26, taga Pondol, Balamban; Vince Cyril Sanchez, 22; Jeffrey Navarro, 30; Jerome Geromo, 41, pulos taga barangay Matab-ang ug Maximo Bacho, 30, taga Baliwagan, Balamban.
Ang operasyon gipangulohan ni Police Supt. Ali Baron, hepe sa kapolisan sa Toledo ug kaubanan.
Matud sa kapolisan diha’ng nakadawat og report may labot sa ilegal nga kalihukan sa usa ka panimalay sa nahisgutang dapit, ila kini’ng gironda diin naaktohan ang mga suspek nga naggunit pa sa mga drug sniffing paraphernalia ug gigamit nga shabu.
Misuway pa sa pag-eskapo ang duha sa suspek apan nasignit ra gihapon sa kapolisan.
Dugay na usab nga gipanid-an sa kapolisan ang mao’ng lugar may labot sa giingong suyopanan. – /GMR) (BANAT NEWS)