CEBU, Philippines – Wala pay napilian nga kandidato sa pagka-presidente sa nasud ang Barug Alang sa Kauswagan ug Demokrasya (Bakud) Party sa ikalimang distrito sa lalawigan sa Sugbo sa eleksiyon sunod tuig.
Kini bisan kaalyado sila sa Liberal Party sukad niadto’ng eleksiyon sa 2013. Matud sa pangulo sa Bakud ug Bise Mayor Ramon ‘Red” Durano VI sa dakbayan sa Danao nga mopahibawo ra sila unya kung kinsa ang ila’ng kandidato sa pagka-presidente.
Si LP provincial chairman ug Gobernador Hilario Davide III nihangyo sa mga sakop sa Bakud sa pagsuporta kang kanhi Interior and Local Government secretary Manuel “Mar” Roxas II sa pagka-presidente ug sa iyang runningmate.
Kini atol sa convention ug nomination sa mga kandidato sa Bakud sa umaabot eleksiyon diin gipatambong si Davide.
Si Davide ug Bise Gob. Agnes Magpale lakip sa giproklamar Bakud nga ilang kandidato sa pagka-gobernador ug bise-gobernador. Si Davide nanghinaut sa suporta sa Bakud kang Roxas.
“Ato paningkamutan nga si Sec. Roxas ang modaug sa Sugbo ilabi na sa fifth district kay we are backed by very strong party, Bakud,” matud ni Davide. – /EIM) (BANAT NEWS)