CEBU, Philippines – Giawhag sa hunta probinsiyal sa Sugbo ang mga lokal nga kagamhanan nga may skywalk sa ila’ng lugar nga unta ipaayo ug paninduton ang pasilidad. Gawas niini gimanduan usab ang mga local government units sa pag-awhag sa mga tawo nga moagi sa skywalk sa ila’ng pagtabok sa karsada sa paglikay sa disgrasya. Si Bokal Arleigh Sitoy nakabantay nga bisan og adunay sky walk, kasagaran sa pedestrian molabang gihapon sa karsada diin peligro kaayo.
Sa mao’ng sitwasyon matud ni Sitoy nga ang mga skywalk nahimo’ng wala’y gamit. Ang gobiyerno nigasto og milyones sa pagpatukod sa mga skywalk alang sa katawhan aron malikay sa disgrasya kung motabok sa karsada.
Ang hunta probinsiyal nanawagan usab sa mga LGUs nga mohimo og mga lakang aron ang publiko maaghat sa paggamit sa skywalk.
Gisugyot sa hunta probinsiyal nga ang mga habog nga hagdan sa skywalk ilisan og rampa o escalator aron sayon sa publiko ug maaghat na sila sa paggamit sa pagtabok sa pikas habig sa karsada. – /GMR) (BANAT NEWS)