CEBU, Philippines - Gitulis sa tulo ka wala mailhi’ng armado’ng lalaki nga ang senina may marka’ng “CIDG” ang usa ka salesman samtang nakighinabi sa kustomer pasado alas 12 sa udto niadto’ng Biyernes sa Buanoy, Balamban.
Ang biktima naila nga si John Rey Malayu, 36, samtang ang driver sa Suzuki nga motor may gitas-on nga 5’8”, nagsul-ob og itom nga jacket, itom nga karsones ug nagsul-ob og itom nga helmet.
Ang angkas may gitas-on nga 5’5” ug nagsul-ob og itom nga sweatshirt nga may marka nga “CIDG” sa atubangan ug nag-skinny jeans. Ang driver sa XRM nga motor nagsul-ob og itom nga jacket, blue nga karsones ug itom nga helmet.
Base sa imbestigasyon sa kapolisan sa lungsod sa Balamban nasayran nga ang duha ka motor mihunong sa tungod sa tindahan nga nahimutangan sa biktima.
Nipalit og tubig ang duha ka lalaki ug ninaug ang drayber sa Suzuki nga motor ug nibunot sa wala matino nga kalibre sa armas ug nideklarar nga tulis sa salesman.
Wala kalihok ang biktima ug nakuha sa mga tulisan ang P11 mil nga halin ug ang cellphone sa biktima nga mobalor og P15 mil.
Lakip sa nakuha ang halin sa tindahan dayun sibat ang mga tulisan padulong sa lungsod sa Balamban. (BANAT NEWS)