CEBU, Philippines - Ang 26 ka mga Taiwanese nga nadakpan sa kapulisan niadtong adlaw nga Martes nga gituohang sakop sa usa ka sindikatong mangilkil pinaagi sa internet ang ipang-deport balik sa ilang mga nasud human gipangkanselar ang ilang mga pasaporte.
Kini ang gitug-an ni Senior Superintendent Rey Lyndon Lawas, hepe sa Regional Directorial Staff sa Police Regional Office-7.
Matud pa ni Lawas nga ang Taipei Economic and Cultural Office dinhi sa nasud ang gikatakdang mopakanselar sa pasaporte sa 26 ka mga Taiwanese aron paghatag og dalan sa dinalian nga pag-deport kanila. Ang PRO-7 ang hugot ‘sab nga nag-monitor sa Chinese Consulate kun mohimo og susamang plano alang sa nahibiling 43 ka mga Chinese nga nadakpan.
Si Lawas miingon nga ang TECO pa sa pagkakaron ang nagproseso sa mga dukomento sa ilang mga kababayang suspek. Giklaro ni Lawas nga walay kompetisyon tali sa PRO-7 ug Taiwan kung kinsay mopasaka og kaso batok sa mga langyaw.
“There is no competition in fact we are mutually cooperating, ni-ari sila seeking our support. Siguro it’s a matter of who is going to file the case…wala man poy aggrieved party sa Pilipinas,” pagklaro pa ni Lawas.
Dugang pa ni Lawas nga ang kaso orihinal nga gipasaka ubos sa TECO, apan sa gihimo nga imbestigasyon nasuta nga ang sindikato nga grupo dinhi sa nasud naghimo sa ilang trabaho.
“This case is being recognizable in their area and considering the victims are from their place they have to file the case so they need to be deported for them to answer the case,” dugang pa ni Lawas.
Hinuon ang opisyal miingon nga ilang ipadayon ang pagpasaka og kaso batok sa mga langyaw nga dili ma-deport balik sa ilang nasud tungod sa kalapasan sa Immigration Laws ug sa Access Device Regulation Act of 1998. (BANAT NEWS)