CEBU, Philippines – Posible’ng masugamak sa kaso sa Ombudsman ang mga local government units nga dili makapatuman sa Ecological Solid Waste Management Program o ang Republic Act 9003.
Gibutyag sa pangulo sa Provincial Environment and Natural Resources Office (PENRO), Atty. Chad Estella, nga unom lang ka LGUs ang dunay sanitary landfill nga gilangkuban sa Dalaguete, Asturias, Compostela, Consolacion, dakbayan sa Talisay ug Mandaue.
Ang dakbayan sa Naga, Carcar ug lungsod sa Minglanilla adunay Material Recovery Facility (MRF) ug private firm ang mokolekta sa ila’ng mga basura.
Laing mga LGU nga functional nga MRF ang Cordova, Barili, Dalaguete, Poro, San Francisco, San Fernando, Argao, Balamban, Santa Fe, Medellin, dakbayan sa Mandaue, Liloan, Moalboal ug Asturias.
Sa tuig 2015, ang probinsiya nigahin og P26.2 milyones alang sa MRF sa mga LGUs.
Subay niini, unom ka LGUs lang nga gilangkuban sa Malabuyoc, Boljoon, Tuburan, Santa Fe, San Remigio ug Alegria ang nakaduso og Waste Analysis and Characterization Study (WACS).
Sa 53 ka siyudad ug lungsod, 38 lang ang nakaduso og 10-year SWM Plan.
Matud ni Estella nga ang mga mayor mao’y makiha sa wala pagpatuman sa ESWMP. – /GMR) (BANAT NEWS)