CEBU, Philippines – Nasakmit ang mga armas ug drugas sa duha ka managlahi nga operasyon sa kapolisan sa dakbayan sa Sugbo ug lungsod sa Consolacion niadto’ng Biyernes.
Nasikop sa mga sakop sa Criminal Investigation and Detection Group-7 si Raffy Cerafica, 39, pinasikad sa search warrant sa balay niini sa Sabellano Street, Punta Princesa, dakbayan sa Sugbo alas 3 pasado sa niagi’ng hapon.
Nasakmit ang duha ka kalibre .38 nga revolver ug usa ka .32 kalibre nga pistola samtang nakuhaan sab og drug paraphernalia sulod sa kwarto si Cerafica.
Nakadawat og kasayuran ang CIDG-7 nga nalambigit ang suspek sa pagpamaligya og ginadili’ng drugas ug may armas sab kini nga gihuptan.
Gihimakak sa suspek ang kalambigitan sa pagbaligya sa ginadili’ng drugas apan niangkon nga mogamit siya niini.
Ang armas giingong pagpanalipod kini sa iya’ng kaugalingon kay dunay mga tawo nga nag-hunting niya. Sumala pa sa CIDG-7nga makaduha na nasikop ang suspek ug na-abswelto sa una’ng kaso nga paghupot og ginadili’ng drogas.
Samtang nasakmit ang mokabat sa P50,000 nga kanidad sa shabu, armas ug drug paraphernalia gikan sa duha nga nadakpan sa buy-bus bust operation sa Nangka, Consolacion ala una pasado sa hapon niadto’ng Biyernes. Si Police Officer 1 Retchie Guilleran sa Consolacion Police Station niila sa nadakpan nga sila si Allan Judilla, 38, taga Purok 1 sa nahisgutang lugar.
Diha’ng gidakop si Judilla, didto usab si Randy Torrefil, 28, nga nagpuyo sa mao’ng dapit hinungdan nga lakip sa gidakop. Sa pagrekisa nakuha ang kalibre .38 kang Judilla ug usa ka medium-size ug upat ka gagmay nga pakete sa shabu samtang si Torrefil nakuhaan og gamay nga pakete’ng shabu ug mga drug paraphernalia. – /GMR) (BANAT NEWS)