CEBU, Philippines - Gihimakak ni Mayor Paz Radaza ang pasangil sa negsoyante nga si Efrain Pelaez Jr. nga gipasagdan sa kagamhanan ang basura sa dakbayan sa Lapu-Lapu.
Gani sukad Enero karong tuiga, nakakolekta na ang siyudad og P310,000 gikan sa multa sa 1,009 ka tawo nga nasakpang nagpataka og labay sa basura.
Matud ni Radaza nga ang nakolekta nagpakita nga aduna sila’y gihimo sa basura.
Human nipahibawo si Pelaez nga mopapili sa pagka-mayor, nibahad kini nga mokiha batok ni Radaza ug mga kapitan labot sa nagpasad nga basura.
Si Radaza niangkon nga dili “totally free” sa basura ang dakbayan apan adunay kalambuan sila’ng nahimo aron magpabilin nga limpyo.
Basi sa record sa Solid Waste Management Office sa dakbayan, 121 ang nahatagan og information education campaign sa 19 ka barangay ug 109 ka sitio nga adunay 1, 466 ka nangapil sulod sa walo ka buwan.
“Before siya monga-nga sa iya’ng baba, tan-awon usa na niya ang iya’ng kilid,” matud ni Radaza. (BANAT NEWS)