CEBU, Philippines - Mokabat sa P200 mil nga kantidad sa mga isda ang nasakmit gikan sa duha ka panagatan nga ilegal nga nanagat sa may isla sa Kinatarcan, Sta. Fe pasado alas 11 sa nakalabay nga buntag.
Ang panagatan gikan sa lungsod sa Madridejos nga may tag 19 ka tripulante ug usa ka kapitan nga pulos residente sa mao’ng lungsod.
Ang duha ka kapitan giila nga sila si Donato Villaceran sa fishing boat nga AC ug si Rogelio Forosuelo sa JSV.
Sumala pa ni Rommel Lirasan, pangulo sa Bantay Dagat sa San Remigio, nga nagpatrolya sila diha’ng nasakpan ang duha ka panagatan nga nihimo sa pagpanagat nga hulbot-hulbot.
Nasakmit ang tulo ka iho nga may gitas-on nga tulo ka tiil ug ang duha may gitas-on nga duha ka tiil ug ang 90 ka banyera sa isda nga nikantidad og P200,000. Ang operasyon giabagan sa Guardian of the Sea nga giumol sa kanhi hepe sa Provincial Anti-Illegal Fishing Task Force nga si Loy Madrigal.
Ang mga iho gipalubong na lang samtang ang mga isda gipanghatag ngadto sa mga mananagat.
Gibutyag ni Lirasan nga ila’ng nasuta nga ang duha ka commercial fishing vessels wala’y clearance gikan sa Philippine Coast Guard sa ila’ng pagnabigar.
Ang mga dinakpan pasakaan og kaso’ng kalapasan sa Fisheries Code of the Philippines ug kalapasan sa Provincial Ordinance nga nagprotektar sa mga iho. (BANAT NEWS)