CEBU, Philippines - Gituohang usa lang ka grupo ang responsabli sa duha ka insidente sa pagpanulis nga nagligas lang og pipila ka minutes sa lungsod sa Balamban sa nakalabay nga hapon. Ang grupo gilangkuban sa tulo ka armado’ng tulisan sakay sa duha ka motorsiklo nga nag-helmet ug nag-jacket.
Ala 1:30 sa hapon una’ng nabiktima sa pagpanulis ang kolektor sa Cebu People’s Coop nga si Ramolito Gutang, 35, taga dakbayan sa Toledo.
Samtang nakig-estorya ang biktima sa iya’ng kustomer sa sitio Lacdon, Aliwanay, Balamban, kalit lang niabot ang mga tulisan ug nipasumangil og palit og sigarilyo sa tindahan.
Kalit lang nition og pistola sa biktima ug gikuha ang P4,000 nga kwarta ug cellphone nga kantidad og P3,000 dayun sibat.
Ala 1:44 sa hapon sa barangay Buanoy nalabyan sa mga tulisan ang usa ka salesman sa softdrinks sa may bakeshop ug gihapit sab og tulis.
Sa gihapon nipasumangil ang mga tulisan og palit og pan ug pagkataud-taud gitulis ang salesman nga si Hilario Amodia, 49, taga barangay Santa Cruz, Balamban. Nadala sa mga tulisan ang P15,000 sa biktima.
Laing pagpanulis sa usa ka ahente og sabon nahitabo sa barangay Matab-ang, dakbayan sa Toledo sa susama’ng takna.
Ang biktima giila nga si Alphrey Mag-aso, 38, taga barangay Cabitoonan.
Tulo ka lalaki nga nag-helmet sakay sa duha ka motorsiklo ang nihimo sa pagpanulis. Nakuha sa mga tulisan ang halin sa biktima nga mokabat og P1,900 ug cellphone nga mobalor og P1,500. (BANAT NEWS)