CEBU, Philippines - Gidakop sa taga warrant section sa Cebu City Police Office (CCPO) ang usa ka konsehal sa barangay Apas gumikan sa kaso’ng estafa.
Si konsehal Elizabeth Bacasno, 59, gikuha sa kapolisan pasado alas 4 sa nakalabay nga hapon sa Purok 6, sitio San Miguel.
Matud ni Senior Police Officer 4 George Malinao nga human nila nadawat ang kopya sa warrant of arrest, ila dayun giadto ang balay sa konsehal.
Sumala pa ni Malinao nga boluntaryo nga niuban ang konsehal.
Apan ang kapitan nga si Ramil Ayuman nga nahinabi sa Banat News niingon nga nagduda siya nga may bulok sa politika ang nahitabo sa iya’ng konsehal.
Si Ayuman nitug-an nga gipasakaan na og susama’ng kaso si Bacasno apan gibasura sa korte.
Sa bag-ong kaso, giingong nalutsan og warrant ang konsehal nga wala gani patubaga.
Ang kaso naglambigit sa yuta diin ang mga silingan sa konsehal nga nipasaka sa kaso tigpaluyo sa laing partido.
Lakip sa gibasol ni Ayuman ang wala pagtagad sa abogado ni Bacasno nga si Atty. Ben Militar kinsa wala nakontak sa Banat News alang sa iya’ng pamahayag.
Mokabat sa P512 mil ang gitakda nga piyansa sa 15 ka managlahi’ng kaso nga atubangon sa konsehal. (BANAT NEWS)