CEBU, Philippines – Pangulo sa Police Regional Offie-7 , Chief Superintendent Prudencio Tom Bañas mihulagway nga ‘miscommunication’ lang ang nahitabo kalabot sa isyu sa wala paghinayon paghatag og pasidungog ngadto sa nakalas nga Sugboanong usa sa PNP-Special Action Force didto sa Mamasapano, Maguindanao.
Matud pa ni Bañas duna ra’y wala pagkasinabot tali sa asawa ni anhing Police Officer 2 Romeo Cempron ug sa mga nag-organisa sa plano nga hatagan og Medal of Valor ang mga sakop sa gibansagang SAF-44 apan wala mahinayon.
Sumala pa ni Bañas, sayo lang kaayo napahibalo sa board kun kinsay angay hatagan sa pasidungog.
Si Bañas miingon nga wala unta dayon gipahibalo sa pamilya sa mga sakop sa SAF-44 kun wala pa naaprobahan sa pangulo sa nasud paghatag sa maong medalya.
Ang PNP Medal of Valor maoy giisip nga labing taas nga medalyang mahatag sa usa ka Pangulo sa nasud ngadto sa sakop sa kapolisan tungod sa gipakitang talagsaong kaisog, pagsakripisyo sa kaugalingon nga sobra pa sa gipangayo sa ilang trabaho.
Kahinumdoman nga nahiubos si Dr. Christine Cempron, biyuda ni PO2 Cempron human kini gipahibalo nga siya maoy padawaton sa Medal of Valor nga ihatag sa PNP atol sa usa ka kalihokan sa PNP didto sa kaulohan apan dihang duol na ang maong adlaw, gipahibalo na sab kini nga dili diay madayon. – /EIM) (BANAT NEWS)