CEBU, Philippines - Giawhag sa hunta probinsiyal sa Sugbo ang Kongreso mopalabang og balaudnon alang sa pag-decriminalize sa kaso’ng libelo. Si Bokal Arleigh Sitoy nga nangamahan sa resolusyon sa mao’ng awhag niingon nga ang mao’ng balaud giabusohan.
Gani, niadto’ng Oktubre 2011, ang United Nations Human Rights Committee (UNHRC) nagkanayun nga ang mao’ng balaud kalapasan sa International Covenant on Civil and Political Rights (ICCPR) diin nakapirma ang Pilipinas.
Matud ni Sitoy nga ang libelo kinahanglang i-decriminalize o paubsan ang silot.
Ang libelo usa ka pagpakauwaw o pagdaut sa dungog sa usa ka tawo ug ang mapamatud-an sa kaso mapriso ug makabayad pa og multa.
Adunay uban nga mopasaka og kaso’ng libelo aron lang sa pagpang-harass ilabi na kung naigo sila sa kamatuoran.
Ang balaud usab gigamit sa uban aron pahilumon ang mga tigbalita kinsa nipadayag sa “freedom of speech and expression” pinasubay sa 1987 Philippine Constitution. (BANAT NEWS)