CEBU, Philippines - Mitumaw ang gamay nga tensiyon sa mga residente sa Doña Pepang Cemetery sa Brgy. Tejero, dakbayan sa Sugbo sa dihang nangabot ang mga sakop sa Prevention, Restoration, Order, Beautification, Enhancement (PROBE) team kagahapong adlawa aron sa pag-demolis sa ilang mga panimalay ug tindahan.
Siyam ka panimalay kilid sa dalan atubangan sa Doña Pepang Cemetery ang gipangguba. Gibasol sa pipila ka mga residente si Edgar Quiñones kinsa tigpamaba sa Doña Pepang Osmeña Mausoleum Home Owners Association tungod nga miuna kini sa pagguba sa iyang balay nga nahimutang sa daplin sa dalan.
Matud ni Quiñones nga boluntaryo niya nga giguba iyang balay aron magamit pa ang ubang materyales niini ug nasayod kining wa na siyay mahimo pa bisan supakon pa niya ang kamandoan kay iya sa simbahan ang maong luna, apan kini gikasuko sa iyang mga silingan.
Sumala pa niya, kaniadto pa silang nihangyo nga paliton o kaha abangan ang yuta sa panahon pa ni Archbishop Emeritus Ricardo Cardinal Vidal apan wa hatagi’g pagtagad ang ilang suwat hangyo.
Matud pa sa nangulo sa grupo sa PROBE diha sa demolisyon nga si Arnel Quijano ilang gipadayon ang demolisyon human gibasura sa korte ang temporary restraining order nga gisang-at sa kampo ni kanhi mayor Tomas Osmeña.
Samtang si Barangay Lorega San Miguel kapitan Fritzgerald Herrera nasagmuyo sa gihimo sa Division for the Welfare for Urban Poor (DWUP) nga anha pabalhinon sa iyang barangay ang mga gikan sa maong sementeryo.
Matud niya duna silay resolusyon sa barangay naghangyo ni Mayor Michael Rama ug ni Atty. Collin Rosell nga dili nila dawaton ang mga residente sa Doña Pepang tungod kay aduna pa silay 68 ka informal settlers nga ilang gipangitaan og kapuy-an human sila nasunogan samtang nag-abang og balay diha sa ilang barangay kaniadto. (BANAT NEWS)