CEBU, Philippines – Gipasirad-an na sa kagamhanan sa dakbayan sa Sugbo ang One Citi Link Terminal sa N. Bacalso Avenue, Pahina Central.
Gipatuman ang pagsirado sa mga sakop sa Prevention, Restoration, Order, Beautification, Enhancement (PROBE) Team human nimando si Mayor Michael Rama niadto’ng Hulyo 27. Matud ni Philip Barrientos, officer-in-charge sa terminal, nga niadto’ng Lunes lang sila nakadawat sa notisya gikan sa kagamhanan sa dakbayan ug wala sila nagdahum nga kalit lang gisirad-an gahapon nga wala sila nakapahibawo sa mga nag-abang.
Marso 17, 2015 nipasar ang Terminal Accreditation Committee (TAC) og resolusyon nga nagrekomendar sa pagpahunong sa operasyon sa terminal.
Kini tungod sa kapakyas sa pagbayad sa ila’ng obligasyon sukad pa niadto’ng 2013 nga nagkantidad og P12,802,782.38 ug wala’y Mayor’s Business Permit. Temporaryo nga gipahiluna ang mga V-Hire sa Taboan Public Market.
Si Joyce Ferrer, napulo na ka tuig nga manindahay sa terminal, nipadayag sa kasagmuyo sa kalit nga pagpasira.
Adunay 300 ka V-Hire naggamit sa terminal ug dili mominus 10 ka tenants nga namaligya sa sulod niini. – /GMR) (BANAT NEWS)