CEBU, Philippines – Wala nakauyon si Mayor Michael Rama sa resulta sa night biking nga gipahigayun atol sa Earth Hour activity niadto’ng Sabado.
Gibutyag ni Rama nga wala natuman ang iyang mga conditions sa sa night biking nga gisalmutan sa lima ka libo ka bikers.
“Mura sila’g tag-iya sa dalan nga nakabuhi bisa’g asa agi,” matud niya.
Matud ni Rama nga wala siya nakakita og lane nga igahin lang unta sa mga bikers aron malikay sa disgrasya.
Hinuon wala’y na-record nga disgrasya atol sa maong night ride.
Tungod niini, gipugngan sa mayor ang pag-aprobar sa permit sa Sugbo Bikers sa pagpahigayun sa “penitential ride” karong Abril 2.
Ang penitential ride salmutan unta sa usa ka libo ka sakop sa Sugbo Bikers pinaagi sa pagbisekleta padulong sa 14 ka simbahan sugod alas 4 hangtud alas 8 sa buntag.
Usa sa mga organizers nga si Konsehal Gerardo Carillo malaumon nga matuman nila tanang mga conditions nga ipahamtang alang sa safety sa mga mosalmot. – /GMR) (BANAT NEWS)