CEBU, Philippines - Giila sa kabomberohan sa dakbayan sa Mandaue ang kuyaw sa sunog sa 27 ka barangay panahon sa ting-init.
Si City Fire Marshall, Senior Fire Inspector Joel Abarquez, niila sa mga barangay nga mao ang Looc, Umapad, Opao, Tipolo ug Subangdaku.
Naglakip sa mga sitio nga nagsikitsikit ang mga panimalay mao ang Bohol-Bohol ug Superior sa Looc ug Capusoan sa Cambaro, Kamanggahan sa Umapad.
Dugang mga sitio nga giisip sa kabomberohan sa dakbayan nga fire prone areas ang Kalubihan sa Umapad, Kamunggay sa Paknaan, Lapyahan sa Labogon, Tondo sa Tingub ug Little Tokyo sa Maguikay.
Gani gialarma sa kabomberohan sa dakbayan sa Mandaue ang kalit nga pag-ulbo sa kayo sa sitio Relis, Basak alas 8:40 sa buntag ug nakontrolar human sa singko minutos.
Si Senior Police Officer 1 Cefriano Codilla, imbestigador sa Bureau of Fire Protection (BFP) sa dakbayan sa Mandaue, niila sa panimalay nga nasunog nga gipanag-iya ni Matilda Dorothea Sanqueza nga ginama sa semi-concrete materials.
Matud ni Codilla nga ang sunog kagahapon mao’y ikalima nga ila’ng gitubag pagsaulog sa Fire Prevention Month sa Marso. (BANAT NEWS)