CEBU, Philippines — Nasikop sa kapolisan sa dakbayan sa Sugbo ang tulo ka lalaki sa managlahing operasyon.
Nasikop diha sa Barangay Inayawan sa mga sakop sa Pardo Police Station si Ramil Salazar alyas Nomal, 42, taga Barangay Dawis sa Talisay City tungod sa paghupot og armas.
Ang nagpatrolyang mga polis sa merkado sa Inayawan nakadawat og report nga si Salazar naa sa lugar ug dunay gidalang armas hinungdan nga ila kining giadto ug gisita.
Nakuha kaniya ang usa ka .9mm kalibre nga Black Widow revolver nga may lima ka bala, apan wa makapakita og lisensya niini.
Samtang nasikop sab sa mga sakop sa Mabolo Police Station ang usa ka lalaki nga wanted sa Zamboanga del Norte nga nasigpatan nga nagdisko sa Barangay Kasambagan.
Ang nasikop mao si Lee Cuincy Adriatico, 32, kinsa dunay kasong murder sa sala ni Judge Proferio Mah sa Zamboanga del Norte.
Nadakpan usab ang usa ka drayber sa habal-habal ug iyang pasahero sa mga sakop sa Fuente Police Station tungod sa pagmaneho nga way lisensya ug nakuhaan ug drugas diha sa Barangay Capitol Site.
Ang nasikop sa police checkpoint naila nga sila si Joseph Curaraton ug ang pasahero niini nga si Zeus Codiñera nga taga Juana Osmeña. (BANAT NEWS)