CEBU, Philippines – Gihatagan og pahalipay sa kagamhanan sa dakbayan sa Lapu-Lapu ang usa ka residente nga nagsaulog sa iya’ng ika-100 nga sumad sa adlaw’ng natawhan sa barangay Punta Engaño.
Si Felisa Pagobo nga nagpuyo sa sitio Malingin sa mao’ng barangay ang gitagaan ni Mayor Paz Radaza og usa ka birthday party sa iya’ng panimalay kagahapon samtang niadto pa’ng Pebrero 25 ang iya’ng birthday.
Alang kang Pagobo huna-huna ra sa tawo ang makaangkon og sakit ug angay nga positibo ang panan-aw sa kinabuhi aron magpabili’ng malipayon hangtud sa katiguwangon.
Si Pagobo usa ka kanhi mananagat nga adunay 13 ka apo gikan sa iya’ng 14 ka anak nga kasamtangang nagpuyo sa nagkalain-laing lugar sa dakbayan.
Gawas sa utanon ug baboy nga kaonon, sekreto sa taas nga kinabuhi ni Pagobo ang pagkaon og seafoods sama sa iya’ng paborito’ng sud-an nga isda. Nalipay si Pagobo sa pag-abot sa mayor kinsa personal nga nibisita ug nisaulog sa iya’ng adlaw’ng natawhan bisan og nauwahi na pag-selebrar. Si Radaza niingon nga ang paghatag og pahalipay sa mga senior citizens usa sa mga prayoridad sa iya’ng administrasyon sa dili pa matapos ang iya’ng ikaduha’ng termino sa 2016. Kapin sa 18,000 ka senior citizens sa 30 ka barangay ang rehistrado sa dakbayan sa Lapu-Lapu. – /GMR) (BANAT NEWS)