CEBU, Philippines – Giimbestigar sa Investigation Detection and Management Bureau (IDMB) sa Mandaue City Police Office ang polis sa Presinto 5 kinsa giingo’ng nagpabuto sa armas nga niangol sa 16-anyos nga lalaki.
Ang insidente nahitabo alas 10 pasado ang takna sa gabii niadto’ng Domingo sa Housing, Canduman, dakbayan sa Mandaue.
Nasamad sa iyang tiil ang biktima nga giingo’ng naigo dihang nagpabuto sa iyang armas si PO3 Joel Osabel nga nadestino sa warrant section sa Presinto 5 sa barangay Opao.
Si Senior Inspector Noelie Latornas, hepe sa Presinto 5 sa MCPO, niingon nga naghimo sila og kaugalingo’ng imbestigasyon ug ilang nasayran nga nangita si Osabel sa usa ka bata nga gireklamo sa ilang mga silingan nga kawatan sa maong lugar.
Diha’ng nakaagi sa nagtapok nga mga batan-on sa maong lugar, nangutana si Osabel labot sa maong bata apan wala’y nanug-an hinungdan sa pagpasalba sa iyang armas.
Matud ni Latornas nga posible’ng sa pagpabuto ni Osabel sa iyang armas ngadto sa yuta nituasik ang mga bato nga maoy nakaingon sa pagkasamad sa kumagko sa tiil sa biktima.
Hinuon si Latornas niingon nga ila’ng gitugyan sa mga sakop sa IDMB sa MCPO ang pagpalawom sa imbestigasyon. – /GMR) (BANAT NEWS)