CEBU, Philippines – Gihimakak sa waste disposal company ang alegasyon nga namaligya sila og karne nga dili na angay makaon sa tawo.
Si Joel Jopia, plant manager sa EVO-Enviro Solutions, mipadala sa statement sa kompanya sa Banat News aron klaruhon ang maong reklamo batok kanila.
Matud ni Jopia kinse ka tuig na ang operasyon sa maong kompanya ug usa sila ka lehitimong waste management company ug awtorisado sa National Meat Inspection Service (NMIS) nga modawat og spoiled nga mga karne aron i-dispose.
Ang maong pasangil gihimoan na og imbestigasyon sa Cebu City Health Department ug gipasa na ang resulta sa inspeksyon ngadto sa City Legal Office.
Apan sigon pa ni Jopia mga scavengers nga nanguha og karne sa ilang planta maoy namaligya niini. Giingong dunay lista ang barangay nga mihimo sa imbestigasyon kun si kinsa ni sila.
Matud ni Jopia nga sa ilang parte, nag-imbestigar sila sa ilang security personnel kun kinsay kakunsabo sa nipalusot sa mga karne.
Hangyo sa management sa planta nga mosuporta ang barangay nga dili na manguha og karne sa ilang planta. – /EIM) (BANAT NEWS)