CEBU, Philippines - Nasakmitan og 13 ka gagmay’ng pakete sa shabu ug usa ka granada ang duha ka dinakpan atol sa buy-bust operation sa kapolisan sa Purok Lubi, Canjulao, dakbayan sa Lapu-Lapu niadto’ng Huwebes sa gabii.
Si Police Senior Inspector Vernino Noserale sa Mactan Police Station 2 niila sa mga nadakpan nga sila si Narlito Imbong, 41, ug Carlos Pebida, 44, pulos mga residente sa maong dapit.
Target sa operasyon mao si Pebida kinsa nakuhaan og 11 ka gagmay’ng pakete sa shabu, usa ka medium size ug granada samtang nakuhaan sab og usa ka pakete sa shabu si Imbong.
Nakuha sab sa kapolisan ang drug paraphernalia, P400 nga gituohan nga halin sa ginadili’ng drugas ug P200 nga marked money.
Kasamtangang natanggong sa Lapu-Lapu City detention cell ang duha ka suspek ug mag-atubang og kaso’ng illegal possession of explosives ug kalapasan sa Republic Act 9165 kon Comprehensive Dangerous Drugs Act of 2002. (Christell Fatima M. Tudtud/GMR)(BANAT NEWS)