CEBU, Philippines - Gitabangan sa Project HOPE ang mga lugar sa isla sa Camotes nga naigo sa bagyo’ng Yolanda.
Ang Project HOPE (Health Opportunities for People Everywhere), usa ka non-government organization, niabot sa Sugbo niadto’ng Nobiyembre sa niaging tuig alang sa Yolanda relief operation.
Matud ni Ryoji Noritake, consultant sa Project HOPE, nga nanghatag sila og mga medical equipment kauban ang mga medical volunteers gikan sa Estados Unidos.
Ilang gipaayo ang mga rural health stations sa isla pinaagi sa pundo gikan sa ilang mga donors.
Ang mga doktor duha ka semana nga ni-duty sa Ricardo Maningo District Hospital sa San Francisco, Camotes ug duha ka semana sab sa mga rural health stations.
Matud ni Noritake nga daku ang kadaut sa bagyo’ng Yolanda sa isla sa Camotes apan wala nabalita sa international media hinungdan nga wala kaayo’y niadto sa lugar aron mohatag og tabang.
Ang barangay Calamante sa Tudela; barangay Kawit ug Moabong sa Pilar nakabenepisyo sa mga solar panel.
Gibutangan usab og solar panel ang Rural Health Unit (RHU) sa Pilar ug ang district hospital sa San Francisco.
Ang maong mga solar panel mohatag og power sa water purification system nga gitaud sa Project HOPE ug emergency lighting.
Ang lungsod sa Pilar nakabenepisyo usab sa usa ka “sea ambulance” nga maoy gamiton sa pagtabok sa mga pasyente.
Ang mga proyekto nasugdan niadto’ng Disyembre ug karong adlawa gikatakda ang turnover ceremony niini ngadto sa mga lugar nga makabenepisyo. (BANAT NEWS)