CEBU, Philippines – Usa ka bakery ug tulo ka stalls ang naugdaw sa dihang usa ka sunog ang miigo sa merkado sa lungsod sa San Francisco niadtong nakalabay nga kaadlawon.
Alas 2:50 sa kaadlawon gi-alarma sa kabomberohan ang maong sunog nga naggikan sa kisame sa Pleños Bakeshop nga dali ‘sab nga mikatap sa mga silingan nga tindahan.
Sa pakighinabi sa Banat News sa hepe sa San Francisco Police nga si Sr. Insp. Cesar Misola miingon nga miresponde sila aron paghatag og seguridad sa lugar. Sumala pa ni Misola duna’y tubig apan gikuwang tungod sa kadaku sa kalayo hinungdan nga dali nga mikatap ang sunog.
Alas 3:20 na sa kaadlawon nakontrolar ang maong sunog nga mibilin og danyos nga P1.4 milyon.
Posibleng electrical overload ang hinungdan sa sunog sumala pa sa kapolisan. Ang kabomberohan sa lungsod wa pa makahatag og opisyal nga pamahayag bahin sa hitabo. – /EIM) (BANAT NEWS)