CEBU, Philippines - Duha ka mga lalaki ang nadakpan sa kapolisan sa managlahing dapit tungod sa paghupot og illegal nga drugas.
Gisikop sa mga sakop sa City Intelligence Branch (CIB) sa Cebu City Police Office si Tamachito Bahay, 52, diha sa Sitio San Roque, Barangay Mambaling ning dakbayan sa Sugbo.
Matud pa ni Superintendent Romeo Santander , hepe sa CIB nga nahinabi sa Banat News nga si Bahay usa lang ka sakop sa usa ka drug pusher sa lugar ug igo lang gisugo sa pagdala sa drugas.
Naatlan lang kini sa nagpatrolyang mga sakop sa CIB nga kadudahan kaayo ang lihok ug dihang ilang girekisa nakuhaan kini og 25 ka gagmay’ng pakete ug usa ka daku sa putos nga gituohang drugas nga mikantidad og kapin P70,000.
Samtang nasakmit sa kapolisan ang armas ug shabu gikan sa usa ka tawo nga ilang nadakpan dihang gialarma kini sa mga silingan sa Sitio Capasanan, Barangay Catarman, Lungsod sa Cordova.
Si Senior Police Officer One Larry Wagwag sa Cordova Police Station miila sa suspetsado nga si Aquilino Gardiano, 51,nagpuyo sa maong dapit
Matud pa ni Wagwag nga nakadawat sila og tawag sa telepono gikan sa wala magpaila nga lumolupyo nga nagpahibalo labot sa usa ka lalaki nga may giluklok nga armas.
Sila si Police Officer 2 Noen Deselosa ug mga kauban dali nga misusi sa lugar ug ilang nasigpatan si Gardiano. Sa pagrekisa kaniya nasakpan kining nagluklok og kalibre 357 nga adunay duha ka bala ug upat ka paketeng shabu.
Laing nadakpan mao ang usa ka Maribel Millanos, 33, taga Inabanga,Bohol nga nakuhaan og duha ka dagkong pakete, usa ka medium nga pakete ug tulo ka gagmay nga paketeng gituohang shabu.
Si Maribel nadakpan sa buy-bust operation nga gipangulohan ni Supt. Ricky Delilis, hepe sa Toledo City Police Station. Ang suspek mihimakak sa pasangil. (BANAT NEWS)