CEBU, Philippines – Bisan pa man og gihinayan na ang speed limit sa South Road Properties (SRP) gikan sa 60 kph ug gihimo na lang 30 KPH sa tinguha nga mamenusan ang disgrasya, dunay pipila ang wala gihapon motuman niini.
Usa ka disgrasya ang nahitabo sa SRP kagahapon diin usa ka Dutch nga si Harald Heinz Walter, 55, ang namatay human nalatayan og cement mixer truck human siya mibangga niini. Ang driver sa mixer nga si Roger Visitacion, 44, drayber sa GEO Transport mibutyag nga gikan siya sa dakbayan sa Talisay nagkarga og concrete mix padulong sa University of the Philippines (UP).
Samtang ang biktima nga nagmotor paingon usab sa siyudad sa Talisay apan kusog kaayo ang dagan ug napasok sa ilawom sa trak nga niadtong tungora nag-left turn.
Si Walter dali nga gidala sa Cebu City Medical Center (CCMC) apan gideklarar na kini nga Dead-on-Arrival kon DOA. Matud sa Traffic Enforcer nga miresponde sa hitabo Alberto Ollaban, pareho nga anaa sa saktong lugar ang mixer ug motorsiklo apan basi sa 12-meters nga skid mark ug 7-meters nga drag mark sa motor, klaro nga kusog ang dagan sa biktima. – /EIM) (BANAT NEWS)