CEBU, Philippines - Kapin sa P20 mil ang hinabang sa Pag-IBIG Fund sa biyuda sa duha ka Sugbuanong sakop sa Special Action Force nga namatay sa Mamasapano, Maguindanao. Si Bise Presidente Jejomar Binay ang personal nga nitunol sa tseke sa duha ka biyuda nga sila si Michelle Candano, asawa ni PO1 Windel Candano nga taga Dumanjug, ug PO1 Romeo Cempron nga si Dr. Christine Cempron nga taga Consolacion.
Si Binay nisaad nga motabang sa mga biyuda sa pag-angkon og balay ug yuta.
Nipahibawo sad si Cempron nga nitawag kaniya ang National Housing Authority ug gipapili sila og options sa pagtabang kanila. Una mao ang paghatag og house and lot; ang ikaduha, kung aduna na sila’y balay, mahimo’ng hatagan sila og financial assistance sa NHA sa pagpa-renovate ug improvement sa balay.
Dugang ni Cempron nga kung aduna sila’y yuta, mahimo sila’ng makaangkon og balay ug adunay dugang nga tabang pinansyal nga ihatag ang NHA.
Sa pagkakaron, makig-coordinate sila sa NHA alang sa angay nga tambag human sa pagkamatay sa ilang mga bana’ng polis. (BANAT NEWS)