CEBU, Philippines – Nasikop sa kapolisan ang usa ka lalaki nga gitudlo’ng suspek sa mga pagpanulis sa mga pangpasaheroan nga jeep human gi-alarma nga armado sa sitio Tinabangay, Mambaling pasado ala-una sa nakalabay nga hapon.
Ang dinakpan naila nga si Basilio Ybañez, 25, alyas Negro ug nagpuyo sa maong lugar.
Si Sr. Insp. Gerald Suquib ug kaubanan ang dali nga niresponde sa alarma sa armado’ng tawo nga nag-istambay sa maong lugar.
Nakuha sa kapolisan gikan ni Ybañez ang usa ka .38 revolver nga duna’y tulo ka bala ug usa ka linukot nga marijuana.
Sumala pa nga manaygon sulod sa jeep ang modus sa suspek ug kung makatayming nga mga babaye ang sakay sa jeep diha na manulis.
Kaso’ng paghupot og ilegal nga armas ug drugas ang atubangon ni Ybañez. – /GMR) (BANAT NEWS)