CEBU, Philippines – Gidid-an na ang mga motorsiklo nga makasulod sa Maria Luisa Village sa Banilad, dakbayan sa Sugbo.
Kini ubos sa mga opisyal sa subdivision pinaagi sa ilang bag-ong napili’ng president, Ecking Abellana.
Alas 6 kagahapon sa buntag nagsugod ang mga guwardya sa pagdili sa mga motorsiklo sa mga residente sa sitio Tongo, Mahiga ug Tayong nga makasulod sa subdivision.
Reklamo sa mga residente nga wala sila konsultaha ug wala pahibaw-a ang mga opisyal sa barangay Banilad.
Matud sa pangulo sa mga security guard, Elezar Abregana, mahimo ra nga makalakaw ang mga residente padulong sa ilang mga panimaye.
Yangungo sa presidente sa sitio Mahiga, Ely Patalinghug, nga dili sila gusto og gubot apan buot lang nila nga respetohan isip mga original nga nagpuyo sa lugar pinaagi sa paghatag kanila og agianan.
Si Konsehal Leah Japson ug kapitan Nicolas Leyson Jr. nihimo og negosasyon tali sa board sa Ma. Luisa uban sa magpapatigayun nga si Bunny Pages kinsa usa sa residente sa subdivision.
Ilang nasabutan nga moratorium una hangtud nga magpahigayun og tigum aron mahilot ang nahitabong gubot. – /GMR) (BANAT NEWS)