Kusog nga uwan dala sa Amihan

CEBU, Philippines - Dala sa hangin nga Amihan ang nasinati nga kusog nga uwan sa Metro Cebu kagahapon nga nilanat og pipila ka oras.

Matud sa PAGASA-Mactan ang hanging Amihan ang nakaapektar karon sa panahon diin natala ang 40 millimeters nga uwan.

Si Engr. Al Quiblat, pangulo sa PAGASA-Mactan niasoy sa wala pa nibundak ang kusog nga uwan nipagawas sila daan og rainfall advisory.

Hinuon dili angay mabalaka tungod kay wala’y nasigpatan nga Low Pressure Area o bagyo sulod ug gawas sa Philippine Area of Responsibility.

Gamay na lang sab ang kahigayunan nga dunay bagyo nga mosulod sa Pilipinas sa buwan sa Enero tungod kay Pebrero na ugma’ng adlawa.

Nagkanayun si Quiblat ang Amihan magpabilin hangtud sa Pebrero tungod kay sa Marso hangtud Mayo lauman nga makasinati og shifting sa hangin gikan sa northeast ngadto na sa easterly winds.

Awhag sa ahensiya sa publiko nga magdala gyud og panagang sa uwan ug init tungod kay dili matag-an ang dagan sa panahon.

Samtang niubos ang kahigayunan sa El Niño gikan sa 80 ngadto na sa 50 porsiyento ug gipaabot nga sa Marso ngadto sa Mayo masinati ang El Niño. (Decemay P. Padilla/GMR)(BANAT NEWS)