CEBU, Philippines – Giawhag sa Cebu Provincial Board ang Department of Health ug PNP Crime Laboratory sa paghimo og hiniusang imbestigasyon sa kamatayon sa pasiyente nga babaye sa Mandaue City Hospital nga giingong gidapatan og dili tukma’ng tambal mao nga namatay.
Giaprobahan sa Hunta Probinsiyal ang awhag ni Board Member Thadeo Ouano nga ipasusi sa DOH ug PNP crime laboratory ang reklamo ni Cesar Coliflores, 42-anyos kang kansang asawa nga si Jocelyn namatay samtang gitambalan sa usa ka doktor sa mao nga ospital.
Si Jocelyn sa wala pa mamatay mitug-an nga nagbalikbalik ang iyang hilanat apan matud pa nga human gidapatan og tambal mikalit lang pagkausab ang batasan ug miingon nga siya gituyo pagpatay sa doktor nga nagtambal kaniya.
Nakuhaan og video sa 8-anyos nga anak lalaki ang iyang inahan sa wala pa mamatay.
Ang abogado ni Coliflores nangayo na og medical records sa iyang asawa diha nga na-admit kini sa Mandaue City Hospital isip kabahin sa ilang lakang pagpasaka og kaso.
Apan paabuton una ni Coliflores ang resulta sa pakisusi nga gihimo sa DOH-7 una hingpit nga mopasaka og reklamo batok sa doktor ug duha ka nurse nga nag-atiman sa iyang asawa. – /RUB) (BANAT NEWS)