CEBU, Philippines – Napulo ka lungsod sa habagatan ug amihanang kalungsoran sa Sugbo ang patukoran og classrooms sa Kapitolyo ug abagan usab paggasto sa Ramon Aboitiz Foundation Inc. Giaprobahan sa Hunta Probinsiyal ang resolusyon ni Provincial Board Member Peter John Calderon niadto’ng Lunes nga nagtugot ni Gobernador Hilario Davide III sa pagpirma og kasabotan tali sa RAFI alang sa mao nga proyekto.
Ang mga lungsod nga makabenepisyo sa maong proyekto mao ang Catmon, San Fernando, Compostela, Daanbantayan, Barili, Carmen, Madridejos, Sogod, Santa Fe ug San Remigio.
Siyam ka classroom ang tukuron sa Catmon ug laing unom ka classroom tukuron ‘sab diha sa Sangat National High School sa lungsod sa San Fernando.
Laing unom ka classroom ang tukuron ‘sab sa Bagalnga Integrated School sa Compostela samtang laing unom gihapon ka classroom pabarugon sa Calape National High School sa Daanbantayan.
Si Calderon mibutyag nga ang laing unom ka classroom adto tukora sa Mantalongon National High School sa lungsod sa Barili ug siyam ka classroom sa Carmen National High School sa lungsod sa Carmen.
Didto sa Madridejos National High School ang Kapitolyo ug ang RAFI mopatukod og 12 ka classrooms samtang unom usab ka classrooms ang tukoron sa Mohon National High School sa Sogod.
Apil sa makabenepisyo mao ang Marikaban Integrated School sa lungsod sa Santa Fe nga patukoran og unom ka classrooms samtang siyam ka dugang classroom ang tukoron sa San Remegio National High School sa lungsod sa San Remegio.
Ang mga lungsod nga tukoran og bag-ong tunghaan maoy mo-provide sa institutional, technical ug operational support sa pagpatuman sa proyekto. – /RUB) (BANAT NEWS)