CEBU, Philippines - Giawhag sa Catholic Bishops Conference ang katawhan nga dili unta malurang ang ilang kamahinangpon ug malubong sa limot ang kasadya pagduaw dinhi sa Santo Papa sa miaging semana.
Ang pangulo sa Catholic Bishops' Conference of the Philippines ug Lingayen-Dagupan archbishop Socrates Villegas mipagawas og pag-ampo alang kang Pope Francis nga litukon human sa pagpangalawat sa Santos nga Misa sugod Enero 22 hangtud sa Pebrero 22. Namatikdan ang grabeng paghangop ug pagmahal sa mga tawo kang Pope Francis atol sa pagduaw niya sa nasud gikan Enero 15 hangtud sa Enero 19 nga gisuklian usab sa Santo Papa sa pagdayeg sa pagkarelihiyoso ug pagkamahigugmaon sa mga Filipino.
Gani, gibuak sa maong pagbisita ang tanang world records sa Papal Visit sa dihang mitambong sa usa ka Santos nga Misa ni Pope Francis ang dul-an siyete milyones ka mga tawo.
Matud pang Villegas, iyaha karong namatikdan nga hinayhinay nang gilubong sa limot sa mga Filipino ang maong makasaysayanong mga adlaw samtang nabalik na sa reyalidad ang tanan. Gani daghan nang nanggawas nga mga kontrobersya sa media kalabot sa mga bati nga gipanghimo sa gobiyerno atol sa Papal visit.
Nabantayan usab ni Villegas nga daw nimabaw ang pagtan-aw sa tawo ug wala na sa kung unsay unod. (BANAT NEWS)