CEBU, Philippines - Duha ka mga alarma sa sunog ang miigo sa dakbayan sa Sugbo kagahapon sa kaadlawon sa Sitio Sto. Niño, Barangay Apas ug Miyerkules sa gabii didto sa Barangay Busay.
Matud pa ni City Fire Marshall Rogelio Bongabong nga alas 2:28 sa kaadlawon ilang nadawat ang alarma sa sunog sa barangay Apas nga dali ‘sab nila nga girespondehan.
Sa panimalay ni Ester Garcia giingong nagsugod ang sunog nga gituohang electrical misuse ang hinungdan. Alas 3:10 na sa buntag nakontrolar ang kalayo.
Si Bongbong miingon nga usa sa problema nga ilang nasugatan mao ang kadulhogon sa lugar nga naglisod og sulod ang ilang mga fire truck.
Gisumpay ang mga hoses aron makaabot sa mga balay. Mokabat sa P150,000 ang danyos sa maong sunog. Ang kapitan sa barangay Apas nga si Ramil Ayuman nga nahinabi sa Banat News miingon nga moabot sa 17 ka mga balay ang naugdaw ug duna’y duha nga partially damage.
Ang yuta nga nasunogan gipanag-iya sa probinsiya ubos sa socialized housing sa administrasyong Arroyo, apan dili pa maiya sa mga nagpuyo ang lote tungod kay wala pa makabayad.
Samtang usa sab ka balay ang gilamoy sa kalayo sa Sitio Maaslom, barangay Busay nga gipanag-iya ni Nolito Belarmino, 42, ug nabiyaang linung-ag ang hinungdan niini. (BANAT NEWS)