CEBU, Philippines - Gidakop sa kapulisan ang usa ka 58-anyos nga lalaki’ng magtutudlo ug ilang naluwas ang singko-anyos nga bata’ng lalaki nga gikataho’ng gi-kidnap sa suspetsado didto sa Bacolod City ug gidala dinhi sa dakbayan.
Si Allan Quilbio, taga Bacolod, nadakpan sa gihimo’ng joint operation sa mga sakop sa PNP Anti-Kidnapping Task Force sa Police Regional Office (PRO)-6 ug 7 kaniadto’ng Martes.
Ang bata nga gi-kidnap apan naluwas anak og usa ka call center agent nga nagpuyo sa siyudad sa Bacolod.
Natultolan sa kapolisan ang gitagoan sa suspetsado diha sa usa ka apartment sa dalan Pelaez, sakop sa Barangay San Antonio, nga duol ra sa Camp Sergio Osmeña Sr.
Giklaro hinuon sa kapolisan nga ang gihimo ni Quilbio dili pagpangidnap aron ipalukat ang bata og dako’ng kantidad sama sa sagad himuon sa mga kidnap-for-ransom nga grupo.
Nahibaw-an nga si Quilbio dul-an sa usa ka tuig na nga nag-tutor sa maong bata ug nakahukom sa pagdagit sa biktima ug gidala dinhi sa Sugbo tungod kay may gikasuk-an siya sa inahan sa bata.
Matud sa kapolisan nga si Quilbio midemanda og kantidad gikan sa ginikanan sa bata apan ang suspetsado miingon nga ang kuwarta nga iyang gipangayo alang ra unta nga ibayad sa iyang pagpuyo sa apartment dinhi sa Sugbo.
Pipila ka adlaw ang milabay, midemanda si Quilbio og P16 mil sa inahan sa bata mao nga ang mama dali nga nakig-alayon sa kapolisan sa Bacolod nga mitawag ‘sab dayon sa mga polis sa PRO-7.
Kaniadto’ng Martes sa gabii nangayo na ‘sab si Quilbio og P20 mil ngadto sa inahan sa bata kay mao kini ang iyang nagasto sa pag-atiman sa bata dinhi sa Sugbo. Wala makabantay si Quilbio nga gipanid-an na siya sa kapolisan.
Usa ka polis miingon nga kaniadto pa’ng Enero 5 nga gidala ni Quilbio ang bata dinhi sa dakbayan ug gidala ‘sab niini ang kagamitan sa bata.
Human siya madakpi, si Quilbio mipasabot nga iyang nahimo ang pagdagit sa bata isip panimalos sa inahan nga midaot sa iyang pagkatawo ngadto sa iyang mga kauban sa relihiyon.
Ang dinakpan, nga matud pa usa ka mahuyang, mihimakak sa pagduda nga iyang giabusohan ang bata ug kini miingon nga iya lang suod kaayo ang bata.
Ang mga sakop sa PNP Anti-Kidnapping Task Force miingon nga ila pa ‘sab nga paabuton ang hukom sa inahan sa bata kun mopasaka sila og kaso batok ni Quilbio. (BANAT NEWS)