CEBU, Philippines – Gibuksan ni Mandaue City Treasurer Regal Oliva ang duha ka one-stop-shop alang sa renewal sa business permit ug mayor’s permit.
Ang one-stop-shop gibuksan sa City Hall ug sa Mandaue City Sports and Cultural Complex.
Matud ni Oliva nga ang mokuha ug mag-renew sa ilang business permit ug mayor’s permit dili na magbalhinbalhin sanglit anaa na ang mga buhatan sa bombero, Bureau of Internal Revenue (BIR) ug uban pa.
Gitataw ni Oliva nga ilang gihimo ang pagbutang og one-stop-shop sa tuyo nga mahimong paspas ang pag-andam sa mga dokumento ug dili na kaayo mahasol ang pagproseso niini.
Gihimo nilang sayon ang pamaagi sa pagproseso sa mga dokumento nga naglakip sa pagkompleto lang sa mga rekisito nga gikinahanglan sama sa barangay clearance, application form ug contract of lease niini. Ang Pag-ibig Fund, PhilHealth ug Social Security System (SSS) mahimo na lang ipaulahi sa pagsumiter nga mga dokumento.
Gisugdan ang pagbayad sa buhis niadtong Enero 5 ug molungtad kini hangtud sa Enero 23.
Si Oliva miingon nga ilang gipaningkamutan ang pagkab-ot sa ilang target nga makolektang buhis karong tuiga nga nagkantidad og P2.4 bilyones nga bisan lisud apan mohimo sila og mga pamaagi sa pagkab-ot niini.
Naglakip sa mga pamaagi mao ang pagsuhid sa uban pa nga mga patigayun sa dakbayan nga niadtong nakalabay nga mga tuig nagpadayon sa ilang operasyon ug pakyas sa pag-renew sa ilang mga permits. – /GMR) (BANAT NEWS)